امبارح جت لي مكالمة غريبة أوي..
أصلا أنا مابردش على أرقام ماعرفهاش إلا في حالة واحدة، لو أنا منتظرة مكالمة من شركة شحن مثلا. حظي بقى إني منتظرة اليومين دول مكالمة عشان توصلني أجندة 2016 من "مفكرة" واللي اضطريت اطلبها أونلاين عشان لقيتها خلصانة من ديوان وألف وقرطاسية. ومعنديش أي فكرة الحقيقة أنا مهووسة إني اجيبها ليه وبدور عليها كده ليه!
المهم يعني، لما رديت ع المكالمة مكنتش متوقعة إنه يطلع استاذي اللي درسلي في مدرسة في2009 وقعدت فيها بتاع3سنين قبل ما اروح الكلية
أنا استغربت أصلا إن رقمي لسه معاه.. ومعرفش ليه هو استغرب إن رقمه مش معايا.
اكتشفت اني عمري ما غيرت رقمي موبايلي.
لقيته بيقول لي انه لقاني على لينكد ان وانه انبهر باللي وصلت له النهاردة.. وأنا في عقل بالي "هو إيه اللي وصلت له النهاردة؟".. وإنه كان عارف إني شاطرة أوي.. "شاطرة أوي؟ أممم يعني يمكن اه.. أنا شاطرة!!".. وحسيت بعدها إني نادية الجندي. فاتضايقت وبتلقائية الوضع الدفاعي بتاعي غيرت أنا مسار الكلام وفضلت اسأله أسئلة كتير عنه.
وخلصت المكالمة وفضلت مش مبسوطة انه كلمني. ومش عارفة ليه.
المهم تأثير المكالمة اللي فضل بعدها كام ساعة افتكر الزمن ده.. افتكر2009.. افتكر النقطة اللي وصلتني للنقطة اللي وصلتني للنقطة اللي بقيت فيها أنا هنا النهاردة.
ومافهمتش بردو هو كلمني ليه!
