الفطار مع الاصحاب

بكره جدا الزيارات المفاجئة لابد ان يستاذن الزائر قبل الزيارة جيت من عزومة اسراء استمتعت جدا معاهم اول فطار معاهم في رمضان :
اسراء رئيسة العصابة بالاكاديمية وحسام مدبر الخطط المهنية ضحكت جامد لماعرفت ان اسراء قطعت البصل بقشره يمكن ناتج عن ضغط عليها بسة تمادت في زلة اسراء احزنتني
نور ومفاجئتها للكيان فرحتني من جيتها بعد مرورها بحالة من الاضمحلال تسودها
وفاء الطفله اللي كانت زعلانه معرفش ليه يمكن عشان بعدها عن زميلها مع تكشيرة احمد اللي استغربتلها مش عادته يكون كده خالص مش احمد ده الفتي اللي اتمنيتهاول ماشفته  _____ يكون اخويابالاخص .
دخلت عبده وصدمته انه هيحاسبني جامد علي كلامي معاه بس قلبه طيب جدا سيراميك رويل ههههههههه
اني جي لبونبونايت الكيان هاله تلاجه انتي كنتي جميله جدا شفت فيكي انهارده جمال امومه وتحمل المسئوليه ايوة فعلا احيكي زعلت لماشفتيني وانامحضنتكيش كنت هعيط
بسمة وكنافة وقطايف كنتي روعة مع ان تعب مش باين عليكي بحببك ياكاتي.
المستشار (المافيا) شخص مش عارفه احدد هويته جدا فرحت لما قال لامتثال مساعدته ان امنية ديه هتكون اكبر صحفيه
الهدنة انهارده ولد المترو والبنوتة بتاعت الشعر الاحمر

غلُبت أصالح في روحي

 البوست ده مكتوب لأغراض شخصية بحتة متعلقة باحتياجي للكلام والحفاظ على جزء خاص مني قبل ما أتوه أكتر في الشُغل..
محدش مطالب يقراه ،ومش هيضيف أي حاجة في حياة حد، وشكرًا :)


بحق المراسيل والحروف اللي موتناها عشان متوصلش..
بحق الغضب والخوف ويُتم القلوب والوجع اللي مش بيسكِّته البنادول..
بحق الوحدة ، والمرات اللي منعنا فيها نفسنا عن اللي بنحبهم عشان ميوجعوناش ولا نوجعهم..

بحق العيون المرهقة كل يوم الصبح من العياط ، الأرق والنوم الكتير، ونوبات الفزع ف وسط الخلق..
بحق الغلطات اللي ارتكبناها واللي مرتكبناهاش
بحق الأيام اللي قضيناها ساندين ضهرنا بنعد بلاطات الأرضية بعد ما خسرنا كل حاجة إلّا إيماننا..
بحق المرات اللي خسرنا إيماننا ومنتحرناش..

يارب.. عوضنا

في وقتٍ ما يبدو بعيد اوي دلوقتي.. كانت الأمور أصعب بس كنت أقوى
كنت بقرب مني وبعرف أملاني كفايا، بعمل حاجات كان نفسي فيها بانطلاق وجنان.. أو جايز وقتها البلاك هول مكانتش محسوسة بقوة.. جايز كنت عملية أكتر وواقعية أكتر وبحلم أقل.
“إنني أكبر ، وتكبر معي أشياء كثيرة أولها : الألم . كلما كبرت صار الألم أكبر ، وأبطأ رحيلاً !

* ملحوظات خارجية من باب الـ هيييييح والرغي

صحابي وحشوني ببشاعة / عندي اعداد يارب يطلع حلو/ الحياة هادية وأنا ممتنة لذلك بشدة/ عاوزة أشوفريم وأقعد معاها/ محتاجة كتاب مبهر مبحبش الكتب النص نص/مبحبش مواقع التواصل الاجتماعي/ قايمة البلوجز راحت معرفش ازاي وده باعث على البكاء دلوقتي/ أنا بقيت بكره بالليل عشان مبعرفش أنام/هبدأ في الكتاب بشكل جِدي وهروح لبسمة ورؤئه لما احتاج زقة ;) /هرجع الروابط القديمة مع العلاقات الجديدة/ هحكي حواديت للناس/ هحاول أبطل رغي وزن في ودان ميم قبل ما يسيب البلد/ هشتري فستان عشان كتب كتاب خالو/ هقص شعري عند هدي / هحاول أخد موقف أقل حدة مع االسائقين.

الناس مش شايفين اللي انا شايفاه

بيبَان جدًا.. آخر مرة حد بتحبه اوي هيكسر فيك حتة وأنت طول الفترة اللي فاتت بتقاوم الاعتراف بده؛ بتمسك ليه؟
عشان عاوزتحاول لآخر نفس؟
عشان مش فاهم عملت ايه غلط؟
 عشان مش مستوعب إن الناس بتتغير؟
وقتها بتعمل زي البيانيست اللي خرج بره النوتة ومستني المزيكا والأوركسترا تظبُط معاه في ثانية. بس مبتظبطش، عمرها.

أنا زعلانة يارب. وغرقانة خذلان من فوقي لتحتي. وبسأل نفسي كل يوم ازاي الناس مش شايفين اللي انا شايفاه. ازاي مش شايفين البشاعة اللي وصلنالها. حتى أنا بقيت مؤذية!
الوضع شكله مش مؤقت وشكلنا اتعودنا ع التجاهل والجفا والتعامل من ورا الشاشات وآمنا إن الحب محض رفاهية، والرفاهية محتاجة حاجة تتدفع في مقابلها، ومحدش عاوز يضحي بأي حاجة!
كان المفروض نكبر منعجزش، مفروض نسافر ونشوف الجمال ونتنفس ونواجه العالم بطريقتنا، مفروض منسمحش لأي حد يقول لنا إننا مش مميزين ويكسر قلبنا من غير ما يحس للحظة إن كلامه كله شوك وشوكه كمان مسموم. مفروض منحسش إن الحلم رفاهية.ومفروض اللي بنحبهم بجد يفضلوا. واللي بيحبونا ومبنبادلهمش الحب يسمحولنا ناخد بإيديهم الاتنين ونغمض عيننا سوا ونرجع بالزمن للحظة اللي قبل ما يحبونا، ويغيروا اتجاههم.
مفروض الكون يبقى أكثر منطقية ودفا من إننا نلقط لحظة بالعافية منه كل كام يوم، وندَّعي ببراعة إنها بتصبرنا ع الهمّ اللي بنشوفه. مفروض الشارع ميبقاش بشع ومليان اشباه حيوانات راكبين عربيات أو على رجليهم زي النهارده وزي كل يوم.
مفروض اكون قاعدة دلوقتي بعمل توفلي الشوكولاته، مش بقرا عن المآسي والرسايل المؤذية اللي بوظت يومين ع الأقل من الإجازة وبعدها أعيط وأكتب عشان مش هعرف أحكي لحد ولا أفسر الوجع من غير ما انهار ادامهم.
مفروض يارب أعرف أبقى موجودة مع اللي بيحبوني وموجودين علشاني بالطريقة اللي تضمنلهم إن الاكتئاب مش هيبعدني عنهم...مفروض القصص اللي كانت بتتحكيلنا واحنا صغيرين متتشوهش لما نكبر واللي يشوهها هما هما نفسهم اللي علموهالنا. مفروض أمي تبطل تعيط أدامي وأخويا يسأل عليا وأبويا يبطل يتعامل مع القنابل في شغله في المعادي كل يوم والتاني.
مفروض نبطل نتعايش مع القرف ده.. يارب أنا حزينة عشان بقاوم...أنا وكل اللي حاسين بالغلط بيقاوموا...وبيقعدوا نص الليل يكتبوا ويعيطوا وخلاص! خلصت..

وازاي يارب العالم هيسمع للي أصواتهم مبتوصلش لسواق الميكروباص وهما قاعدين حتى في الكنبة اللي ف النص!

انا خايفة...حقيقي انا مش عارفة اتكلم

فى عشق الورد =)

الورد ده من أجمل الحاجات فى الحياة ، حاجة كده رائعة و جميلة و ممكن يقول أى حاجة احنا مش عارفين نقولها ، سبحان الله فعلا ..ربنا حاطط فى الورد ده قدرة على الوصف و الكلام غريبة ، لو حد زعلان منك و عايز تصالحه هاتله ورد بس و متتكلمش حتى بعدها =) هو هيقوم بالواجب و كمان لما حد بيبقى عيان بيجيبوله ورد ...عبقرى اللى اخترع الفكرة دى لأن فعلا الورد بيدى شحنة جمال للبنى أدم بمجرد انه يشوفه =)