أنا جيلي بالفراولة..أنا جيلي
نهون ده؟
اللي بيتاكل...
آآآآه لا الحقيقة مسمعش عنه
ولا انا برضه..بس بيقولوا طعمه حلو
متصدقيش كل اللي بيتقال
على فكرة انتي قوية قوية جدا
بس ده ميمنعش انك سلبية وانهزامية وخوافة
و...حيلك حيلك..
قال يعني أنتِ الفراشة البريئة
يللا من هنا
صحبتك الملائكة يا عزيزتي
فلتذهبي إلى الجحيم
إن لم يكن هذا الجحيم بعينه
عاوزة اطَلَّع الحزن من جيب الجاكتة
وتوديه فين بالظبط؟
ارميه ع الكومودينو..قبل ما ييجي زلزال يعصف بالكومودينو بالحزن اللي عليه
وبالنسبة للاباجورة؟
مش مهم نركب بدالها تكييف الدنيا بقت حر اوي
واللاب سخن..انا بفطس!!
ولأني مبعرفش أعمل آي كونتاكت مع حد لمدة ثانيتين انا قررت...
أقرأ رواية جديدة
في انتظار غودو...وافضل استنى واستنى واستني..وهوب
اشتري فستان احمر نبيذي صارخ هع
انا معنديش اي حيوانات أليفة!!
صحيح هو السمك حيوانات
لا الطماطم نوع من أنوع الفاكهة.
الشرابات بتزغزغ
والبيجامات اللي عليها نعامة
والزغزغة مبتضحكش زي زمان :(
هو أيسل بتتكتب كده؟ أ يــ ســ ل
عظيم الغروب
أنا هكبر ..هكبر السنادي لوحدي
أنا مش عاوزة أسافر :(
أنا عاوزة اعيط..المطار لأ لأ لأااااااه
النوم مش بييجي لما بنعوزه
النوم بييجي لما بيعوزنا...
حتى الانتهازية وصلت للنوم!
حلمت براجل شبه محمود درويش
وده شكله ايه ده..طويل ولا رفيع
لا واسع!
عاوزة اكتب قصة مأساوية
اكتبي قصة الفانوس اللي اتكسر
أو عن عود الكبريت اللي غرق في البحر...إلا صحيح
هو جودو جيه ف الآخر؟
توهان السنين..
انا مش مجنونة
يمكن لو كنت مجنونة كنت هلاقي تبرير
شفتي فعلاً إن...لا شيء يعجبني!!
مفيش حاجة هتساعك...غير الموت
يمكن يعجبك ساعتها!!
جوايا بيت عصافير مهجور من غير زقزقة
جوايا حد مبقاش مستني غير حاجة واحدة
جوايا حد مش موجود !!
تؤ تؤ مش عاجباني نبرة اليأس ديه
ونعيد من تاني
أنتِ جيلي فراولة...جيلي فراولة أنتِ
...
